by Nostradamus
Cœur si hardy ne sera qui ne tremble.
4.6
D’habits nouveaux après faicte la treuve,
Malice tramme & machination :
Premier mourra qui en fera la preuve :
Couleur Venise insidiation.
4.7
Le mineur filz du grand & hay prince,
De lepre aura à vingt ans grande tache :
De dueil sa mere mourra bien triste & mince :
Et il mourra là où tombe chef lache.
4.8
La grand cité d’assaut prompt repentin
Surprins de nuict, gardes interrompus :
Les excubies & veille sainct Quintin,
Trucidés gardes & les pourtails rompus.
4.9
Le chef du camp au milieu de la presse
D’un coup de fleche sera blessé aux cuisses,
Lors que Geneve en larmes et detresse,
Sera trahie par Lozan & Souysses.
4.10
Le jeune prince accuser faulsement,
Mettra en trouble le camp & en querelles :
Meurtry le chef pour le soustenement,
Sceptre apaiser : puis guerir escrouelles.
4.11
Celuy qu’aura gouvert de la grand cappe,
Sera induict à quelque cas patrer :
Les douze rouges viendront souiller la nappe.
Soubz meurtre, meurtre se viendra perpetrer.
4.12
Le camp plus grand de route mis en fuite,
Guaires plus oultre ne sera pourchassé:
Ost recampé, & legion reduicte,
Puis hors des Gaules du tout sera chassé.
4.13
De plus grand perte nouvelles raportées,
Le raport fait le camp s’estonnera,
Bandes unies encontre revoltées,
Double phalange grand abandonnera.
4.14
La mort subite du premier personnage
Aura changé & mis un autre au regne :
Tost, tard venu à si haut & bas aage,
Que terre & mer faudra que l’on le craigne.
4.15
D’où pensera faire venir famine,
De là viendra le ressasiement :
L’œil de la mer par avare canine
Pour de l’un l’autre donra huyle, froment.
4.16
La cité franche de liberté fait serve,
Des profligés & resveurs faict asyle :
Le roy changé à eulx non si proterve,
De cent seront devenus plus de mille.
4.17
Changer à Beaune, Nuy, Chalons & Dijon,
Le duc voulant amander la Barrée,
Marchant près fleuve, poisson, bec de plongeon,
Verra la queue : porte sera serrée.
4.18
Des plus lettrés dessus les faits celestes
Seront par princes ignorants reprouvés :
Punis d’Edit, chassés, comme scelestes,
Et mis à mort là où seront trouvés.
4.19
Devant Rouan d’Insubres mis le siege,
Par terre & mer enfermés les passages :
D’Haynault, & Flandres, de Gans & ceux de Liege,
Par dons lænées raviront les rivages.
4.20
Paix, uberté, long temps lieu louera :
Par tout son regne desert la fleur de lys :
Corps morts d’eau, terre là l’on aportera,
Sperants vain heur d’estre là ensevelis.
4.21
Le changement sera fort difficile,
Cité, province au change gain fera :
Cœur haut, prudent mis chassé l’inhabile,
Mer, terre, peuple son estat changera.
4.22
La grand copie qui sera deschassée
Dans un moment fera besoing au Roy :
La foy promise de loing sera faulcée,
Nud se verra en piteux desarroy.
4.23
La legion dans la marine classe,
Calcide, Magnes soulphre & poix bruslera :
Le long repos de l’asseurée place,
Port Selyn, Hercle feu les consumera.
4.24
Ouy soubs terre saincte dame voix fainte,
Humaine flamme pour divine voir luire :
Fera des seulz de leur sang terre tainte,
Et les saincts temples par les impurs destruire.
4.25
Corps sublimés sans fin à l’œil visibles
Obnubiler viendront par ces raisons
Corps, front comprins, sens, chief & invisibles.
Diminuant les sacrées oraisons.
4.26
Lou grand eyssame se levera d’abelhos,
Que non sauran don te siegen venguddos :
Denuech l’enbousque, lou gach dessous las treilhos :
Ciurad trahido per cinq lengos non nudos.
4.27
Salon, Mansol, Tarascon, de SEX. l’arc,
Où est debout encor la piramide,
Viendront livrer le prince Dannemarc :
Rachat honny au temple d’Artemide.
4.28
Lors que Venus du Sol sera couvert,
Soubs l’esplendeur sera forme occulte :
Mercure au feu les aura descouvert :
Par bruit bellique sera mis à l’insulte.
4.29
Le Sol caché eclipsé par Mercure,
Ne sera mis que pour le ciel second :
De Vulcan Hermes sera faicte pasture,
Sol sera veu pur, rutilant & blond.
4.30
Plus xi. fois ne voudra,
Tous augmenté & baissez de degré
Et si bas mis que peu or on coudra :
Qu’après faim, peste, descouvert le secret.
4.31
La Lune au plain de nuict sur le haut mont,
Le nouveau sophe d’un seul cerveau l’a veu :
Par ses disciples estre immortel semond :
Yeux au midy, en seins mains, corps au feu.
4.32
Es lieux & temps chair au poiss. donra lieu :
La loy commune sera faicte au contraire :
Vieux tiendra fort puis osté du milieu :
Le mis fort arriere.
4.33
Jupiter joinct plus Venus qu’à la Lune,
Apparoissant de plenitude blanche :
Venus cachée souz la blancheur Neptune
De Mars frappée par la gravée branche.
4.34
Le grand mené captif d’estrange terre,
D’or enchainé au Roy CHYREN offert,
Qui dans Ausone, Milan perdra la guerre,
Et tout son ost mis à feu & à fer.
4.35
Le feu estaint, les vierges trahiront
La plus grand part de la bande nouvelle :
Fouldre à fer, lance : les seulz Roy garderont
Etrusque & Corse, de nuict gorge allumelle.
4.36
Les jeux nouveaux en Gaule redressés,
Après victoire de l’Insubre champaigne :
Monts d’Esperie, les grands liés, troussés :
De peur trembler la Romaigne & l’Espaigne.
4.37
Gaulois par saults, monts viendra penetrer,
Occupera le grand lieu de l’Insubre :
Au plus profond son ost fera entrer,
Gennes, Monech pousseront classe rubre.
4.38
Pendant que Duc, Roy, Royne occupera,
Chef Bizantin captif en Samothrace :
Avant l’assault l’un l’autre mangera,
Rebours ferré suyvra du sang la trasse.
4.39
Les Rodiens demanderont secours,
Par le neglet de ses hoyrs delaissée :
L’empire Arabe revalera son cours,
Par Hesperies la cause redressée.
4.40
Les forteresses des assiegés serrés,
Les proditeurs seront touts vifs serrés :
Onc aux sacristes n’advint si piteux scisme.
4.41
Gynique sexe captive par hostage,
Viendra de nuit custodes decevoir :
Le chef du camp deceu par son langage
Lairra à la gente, fera piteux à voyr.
4.42
Geneve & Langres par ceux de Chartres et Dole,
Et par Grenoble captif au Montlimard,
Seyssel, Losanne par fraudulente dole
Les trahiront par or soyxante marc.
4.43
Seront oys au ciel les armes battre :
Celuy an mesme les divins ennemis
Voudront loix sainctes injustement debatre :
Par foudre & guerre bien croyans à mort mis.
4.44
Lous gros de Mende, de Roudés & Millau,
Cahours, Limoges, Castres malo sepmano :
De nuech l’intrado, de Bourdeaux un cailhau,
Par Perigort au toc de la campano.
4.45
Par conflit roy, regne abandonnera,
Le plus grand chef faillira au besoing :
Mors profligés peu en rechapera :
Tous destranchés, un en sera tesmoing.
4.46
Bien defendu le faict par excellence,
Garde toy Tours de ta proche ruine :
Londres & Nantes par Reims fera defense
Ne passer outre au temps de la bruine.
4.47
Le noir farouche quand aura essayé
Sa main sanguine par feu, fer, arcs tendus,
Trestout le peuple sera tant effraié,
Voyr les plus grans par col & pieds pendus.
4.48
Planure Ausonne fertile, spacieuse,
Produira taons si trestant sauterelles :
Clarté solaire deviendra nubileuse,
Ronger le tout, grand peste venir d’elles.
4.49
Devant le peuple sang sera respandu,
Que du haut ciel ne viendra esloigner,
Mais d’un long temps ne sera entendu :
L’esprit d’un seul le viendra tesmoigner.
4.50
Libra verra regner les Hesperies,
De ciel & terre tenir la monarchie :
D’Asie forces nul ne verra peries,
Que sept ne tiennent par rang la hierarchie.
4.51
Le duc cupide son ennemi ensuyvre,
Dans entrera empeschant sa phalange :
Hastez à pied si près viendront poursuyvre,
Que la journée conflite près de Gange.
4.52
La cité obsesse aux murs hommes & femmes,
Ennemis hors, le chef prest à soy rendre :
Vent sera fort encontre les gendarmes,
Chassez seront par chaux, poussiere, & cendre.
4.53
Les fugitifs & bannis revoquez,
Peres & fils grands garnissant les hauts puits :
Le cruel pere & les siens suffoquez,
Son fils plus pire submergé dans le puits.
4.54
Du nom qui onques ne fut au Roy Gaulois,
Jamais ne fut un fouldre si craintif :
Tremblant l’Itale, l’Espaigne & les Anglois,
De femmes estranges grandement attentif.
4.55
Quand la corneille sur tour de brique joincte
Durant sept heures ne fera que crier :
Mort presagée, de sang statue taincte,
Tyran meurtri, aux Dieux peuple prier.
4.56
Après victoire de rabieuse langue,
L’esprit tempré en tranquil & repos :
Victeur sanguin par conflict faict harangue,
Roustir la langue & la chair & les os.
4.57
Ignare envie au grand Roy supportée,
Tiendra propos deffendre les escriptz :
Sa femme non femme par un autre tentée :
Plus double deux ne fort ne criz.
4.58
Soleil ardent dans le gosier coller,
De sang humain arrouser terre Etrusque :
Chef seille d’eaue mener, son fils filer,
Captive dame conduicte en terre Turque.
4.59
Deux assiegez en ardente ferveur,
De soif estaincts pour deux plaines tasses :
Le fort limé, & un vieillart resveur
Aux Genevois de Nira monstra trasses.
4.60
Les sept enfans en hostaige laissés,
Le tiers viendra son enfant trucider :
Deux par son filz seront d’estoc percés,
Gennes, Florence, lors viendra encunder.
4.61
Le vieux mocqué & privé de sa place,
Par l’estrangier qui le subornera :
Mains de son filz mangées devant sa face,
Le frere à Chartres, Orl., Rouan trahyra.
4.62
Un coronnel machine ambition,
Se saisira de la plus grande armée :
Contre son prince fainte invention,
Et descouvert sera soubz la ramée.
4.63
L’armée Celtique contre les montaignars
Qui seront sceuz & prins à la lipée :
Paysants fresz pousseront tost faugnars,
Precipitez tous au fil de l’espée.
4.64
Le deffaillant en habit de bourgeois,
Viendra le Roy tempter de son offence :
Quinze souldartz la pluspart Ustageois,
Vie derniere & chef de sa chevance.
4.65
Au deserteur de la grand forteresse,
Après qu’aura son lieu abandonné:
Son adversaire fera si grand prouesse,
L’Empereur tost mort sera condamné.
4.66
Soubz couleur faincte de sept testes rasées
Seront semés divers explorateurs :
Puys & fontaines de poysons arrousées,
Au fort de Gennes humains devorateurs.
4.67
L’an que Saturne & Mars esgaulx combust,
L’air fort seiché longue trajection :
Par feux secretz, d’ardeur grand lieu adust,
Peu pluye, vent chault, guerres, incursions.
4.68
En l’an bien proche esloigné de Venus,
Les deux plus grans de l’Asie & d’Afrique
Du Ryn & Hister qu’on dira sont venus,
Crys, pleurs à Malte & costé ligustique.
4.69
La cité grande les exilés tiendront,
Les citadins morts, meurtris & chassés :
Ceulx d’Aquilée à Parme promettront,
Monstrer l’entrée par les lieux non trassés.
4.70
Bien contiguë des grans monts Pyrenées,
Un contre l’aigle grand copie addresser :
Ouvertes veines, forces exterminées,
Que jusque à Pau le chef viendra chasser.
4.71
En lieu d’espouse les filles trucidées,
Meurtre à grand faulte ne sera superstite :
Dedans le puys vestales inondées,
L’espouse estaincte par hauste d’Aconite.
4.72
Les Artomiques par Agen & Lectore,
A sainct Felix feront leur parlement :
Ceulx de Basas viendront à la mal’heure,
Saisir Condon & Marsan promptement.
4.73
Le nepveu grand par forces prouvera,
Le pache fait du cœur pusillanime :
Ferrare & Ast le Duc esprouvera,
Par lors qu’au soir sera le pantomime.
4.74
Du lac Lyman & ceux de Brannovices,
Tous assemblez contre ceux d’Aquitaine :
Germains beaucoup encore plus Souisses,
Seront de
faictz avecques ceux du Maine.
4.75
Prest à combatre fera defection,
Chef adversaire obtiendra la victoire :
L’arrieregarde fera defension,
Les defaillans morts au blanc territoire.
4.76
Les Nictobriges par ceux de Perigort,
Seront vexez tenant jusques au Rosne :
L’associé de Gascons & Bigort,
Trahir le temple, le prestre estant au prosne.
4.77
SELIN monarque l’Italie pacifique,
Regnes unis Roy chrestien du monde :
Mourant voudra coucher en terre blesique
Après pyrates avoir chassé de l’onde.
4.78
La grande armée de la pugne civile,
Pour de nuict Parme à l’estrange trouvée :
Septanteneuf meurtris dedans la ville,
Les estrangiers passez tous à l’espée.
4.79
Sang Royal fuis, Monhurt, Mas, Eguillon,
Remplis seront de Bourdelois les landes :
Navarre, Bygorre poinctes & eguillons,
Profondz de faim vorer de liege glandes.
4.80
Près du grand fleuve, grand fosse, terre egeste,
En quinze pars sera l’eau divisée :
La cité prinse, feu, sang, cris, conflict mettre,
Et la plus part concerne au collisée.
4.81
Pont on fera promptement de nacelles,
Passer l’armée du grand prince Belgique :
Dans profondrés & non loing de Brucelles,
Outre passés, detrenchés sept à picque.
4.82
Amas s’approche venant d’Esclavonie,
L’Olestant vieux cité ruynera :
Fort desolée verra sa Romanie,
Puis la grand flamme estaindre ne sçaura.
4.83
Combat nocturne le vaillant capitaine,
Vaincu fuyra, peu de gens profligé:
Son peuple esmeu, sedition non vaine,
